А.Атамбаевдин жан сакчысы Дамир Мусакеев эмне кылмыш жасаган?

Экс-президент Алмазбек Атамбаевдмн жан сакчысы Дамир Мусакеев кандай кылмышка шектелип жатканы туралуу Аскердик прокуратура билдирүү таратты. Маалыматка ылайык, Мусакеев 2016-2017-жылдары кызматтык абалынан кыянаттык менен пайдаланып, 9-бөлүмдө иштеген өзүнүн жакын адамдарына мамлекеттик батирлерди ыйгарган.

Анын айынан алдыңкы кезекте турган, чынында эле турак жайга муктаж 18 кызматкер үй ала албай калышканы айтылат. Укугу бузулган жабырлануучулар УКМКга арыздангандан кийин кызматтык териштирүү жүрүп, аталган фактылар аныкталган.

Аскердик прокуратура тараткан билдирүүгө караганда Мусакеев турак жай кодексинин талаптарын одоно бузуп ,узак мөөнөттөн бери күтүп кезеги келгендерди эске албай, акыркы кезектеги кызматкерлерге батир берген. Мындай мыйзамсыз жол менен 15 кызматтык батир берилген, анын ичинде мурда алган үч кызматкерге экинчи ирет кайталап берилген

Мындан улам Бишкек гарнизонунун аскер прокуратурасы Дамир Мусакеев Кылмыш кодексинин 320-беренеси боюнча (“Кызмат абалын өз кызыкчылыктарына пайдалануусу, атайылап же этиятсыздыктан олуттуу зыян келтирген”) шектелип жатканын кошумчалайт

Бул боюнча кечээ КСДП фракциясы билдирүү тараткан. Анда “Ал батирлер кызматтык батирлер болгондуктан бири да менчиктештирилбеген, ошондуктан мамлекетке зыян келтирилбеген” деп айтылган. Мындай пикирге аскер прокуратурасы жооп кайтарып, мыйзам боюнча УКМКнын 9-кызматынын кызматкерлери алган кызматтык батирлерин белгиленген убакыт өткөндөн кийин бекерге менчиктештирип алат. Бул алардын мыйзамдык укугу катары саналаарын билдирген

Белгилей кетсек, Улуттук коопсуздук мамлекеттик комитетинин 9-бөлүмүнүн жетекчиси Дамир Мусакеевди, президент кезинде Алмазбек Атамбаев аталган кызматка 2016-жылдын 1-июнунда дайындаган.

УКМКнын 9-кызматы президент, өкмөт башчы, Жогорку Кеңештин жана Жогорку соттун төрагалары өңдүү мамлекет жетекчилердин, стратегиялык маанидеги объектилердин коопсуздугуна жооп берет.