Бишкек шаардык милициясы “Айчүрөк” соода борборунун жанынан чет элдик жаранды сабаган шектүүнү кармады. Нигериялык жаранды сулата сокту делген адам 3-июлда кармалды. Маалыматка ылайык, ал Ысык-Көл облусунун 1997-жылы туулган тургуну болуп чыкты.
Кыргызстандагы Кембридж мектебинде иштеген нигериялык мугалимди 2-июль күнү белгисиз бирөө ур-токмокко алып, жабырлануучу оор абалда ооруканага түшкөн. Учурда ал реанимацияда дарыланууда.
Аталган окуяны Свердлов райондук милициясы Жазык кодексинин 138-беренеси («Саламаттыкка оор зыян келтирүү») менен Кылмыштардын жана жоруктардын бирдиктүү реестрине каттап, сотко чейинки өндүрүш иштери башталды. Шектүү шаардык ички иштер башкармалыгынын убактылуу кармоочу жайына киргизилди.
