Бишкектеги “Тунгуч” кичирайонунда дагы бир төлөм терминалынан акча уурдалды. Бул тууралуу сатуучу агент Илья Кириченко билдирди.
Анын айтымында, эки киши кечээ, 29-апрелде түнкү саат 04:00 чамасында терминалды ачышкан. Кылмышкерлердин бул кылыгы байкоо камераларына түшүп калган.
“Алар баш кийим жана беткапчан экен. Терминалды лом менен ачышыптыр. Анын ичинде 13 миң сом болгон”, – деди сатуучу.
Ошондой эле Кириченко милицияга арыз жазганын айтты.
Эскерте кетсек, буга чейин коменданттык саат учурунда төлөм терминалдарын талкалоого, уурдап кетүүгө аракет кылуунун бир нече фактылары катталган.
