Кемин районунда жергиликтүү тургун айылдашын мууздады. Бул тууралуу Чүй ОИИББ билдирди.
17-мартта саат 8:55те милицияга Кызыл-Октябрь айылынын жашоочусу өз үйүндө каза болгону тууралуу маалымдалган. Маркум — 1954-жылы туулган И.С. зомбулук менен өлтүрүлгөнү, сол кулагынын асты бир нерсе менен сайылганы жана кесилгени аныкталган.
Бул факт боюнча адам өлтүрүү беренеси менен кылмыш иши козголуп, 1989-жылы туулган С.Т. кармалды. Ал — маркумдун айылдашы.
Алдын ала маалымат боюнча, маркум менен шектүү спирт ичимдигин ичип жатып урушуп кетишкен. Шектүү Кемин РИИБдин абагына киргизилди. Тиешелүү экспертиза дайындалды. Тергөө уланууда.
