«Арсенал» академиясынын мурдагы оюнчусу, 21 жаштагы Билли Вигар каза болгонун клуб билдирди. «Арсеналга» 14 жашында кошулган Вигар акыркы убакта жарым профессионалдык «Чичестер Сити» клубунда ойногон.
Каргашалуу окуя өткөн ишемби күнү «Уингейт энд Финчли» командасына каршы беттеште болуп, Вигар башынан оор жаракат алып, эс-учун жоготкон. Ал дароо ооруканага жаткырылып, жасалма комага салынган. Шейшемби күнү ага операция жасалган, бирок дарыгерлердин бардык аракеттерине карабастан, жаракат өтө оор болуп, Билли бейшемби күнү эртең менен каза болду.
Вигардын үй-бүлөсү «Чичестер Сити» клубу аркылуу билдирүү таратты: «Өткөн ишембиде мээсинен олуттуу жаракат алгандан кийин, Билли Вигар жасалма комага салынган. Шейшемби күнү ага айыгуу мүмкүнчүлүгүн жогорулатуу үчүн операция керек болгон. Бул жардам берсе дагы, жаракат ага өтө оор болуп, бейшемби күнү эртең менен каза болду. Баштапкы кабарга болгон жооптор Билли спортто канчалык бааланып, сүйүлгөнүн көрсөтүп турат. Анын үй-бүлөсү сүйгөн спорту менен ойноп жатканда ушундай окуя болгонуна катуу кайгырып жатышат.»
Кайгылуу окуяга байланыштуу, «Чичестер Сити» футбол клубу ушул ишембиге пландаштырылган «Льюиске» каршы боло турган беттешин кийинкиге жылдырды.
Өз карьерасында Билли Вигар «Арсеналдан» тышкары «Дерби Каунти», «Истборн Боро» жана «Гастингс Юнайтед» клубдарында ойногон, андан кийин бир ай мурун гана «Чичестер Ситиге» кошулган.
